I Nyagatare bizihije Umunsi Mpuzamahanga w’Amakoperative bayasaba kurushaho kunoza imiyoborere

Kuri uyu wa kane, tariki ya 27 ugushyingo 2025, mu karere ka Nyagatare hizihijwe ku rwego rw’akarere Umunsi Mpuzamahanga w’Amakoperative, ufite insanganyamatsiko igira iti “Koperative: Umuyoboro Udaheza Uganisha ku Bisubizo Birambye byubaka Isi Nziza.” Ni umuhango witabiriwe n’abayobozi b’inzego zitandukanye, abahagarariye amakoperative, ndetse n’abanyamuryango bayo. Abawitabiriye bishimiye ko amakoperative yateye imbere abikesha imiyoborere myiza, basaba ko yose yarushaho kunoza imikorere n’imiyoborere.

Mu ijambo rye, Vice Mayor Matsiko Gonzague, Ushinzwe Iterambere ry’Ubukungu mu karere ka Nyagatare, yasabye abayobozi b’amakoperative kurangwa no gukorera mu mucyo, bubahiriza amategeko n’inshingano zabo, kuko “gukorera mu bwiru no gukurikiza amarangamutima ari bimwe mu bisenya amakoperative.” Yaboneyeho no gushimira ubuyobozi bukuru bw’igihugu burangajwe imbere na Nyakubahwa Perezida wa Repubulika, agaragaza ko imiyoborere ye myiza ikwiye kuba isoko n’icyitegererezo ku bayobora amakoperative. Ati “Imiyoborere myiza ya koperative ni yo ituma itera imbere.”

Vice- Mayor Matsiko yashimangiye ko akarere kihaye ingamba zo gukorana n’Ikigo cy’Igihugu Gishinzwe Amakoperative (RCA) mu gushyira amakoperative mu byiciro hagamijwe kuyafasha guteza imbere ibikorwa byayo no kongera ubufasha bujyanye n’icyiciro buri koperative ibarizwamo.

Mu isesengura ryakozwe na RCA ku bufatanye n’akarere, byagaragaye ko mu makoperative arenga 300 yakoreraga mu karere, 235 ari yo akora neza kandi yizewe, mu gihe andi “yatsikiye” kubera ibibazo by’imiyoborere n’imicungire y’umutungo. Ayo makoperative afite abanyamuryango 98,634,  barimo abagabo  64,437 n’abagore  34,194, bakora mu byiciro bitandukanye birimo ubuhinzi, ubworozi, ubukorikori, kongerera agaciro umusaruro, serivisi ndetse na  SACCO.

Abayobozi n’abanyamuryango batanze ubuhamya

Nyirandikubwimana Gaudence, Umuyobozi wa KODERVAM, yashimye uruhare rw’ubuyobozi bw’igihugu mu guteza imbere amakoperative, avuga ko imiyoborere myiza yabafashije kwesa imihigo no kuba abambere ku rwego rw’akarere n’intara. Ati“Gukorera hamwe no gukorera mu mucyo ni byo byatumye tuba intangarugero.”

Ntaganda Abdul Wahab, uhagarariye RCA mu Ntara y’Iburasirazuba, yagaragaje ko isesengura ryakozwe ryerekanye ko hari amakoperative yari yarabaye “baringa”, adafite ibikorwa bifatika. Yasabye ko koperative zigaragarira mu bikorwa bifatika kandi zicunga neza umutungo wazo, harimo kugira abakozi bashinzwe imicungire y’umutungo n’ubuyobozi bubazwa inshingano zabwo.

Yibukije ko iterambere ry’amakoperative ritagendera ku mubare w’abanyamuryango gusa, ahubwo rishingiye ku kubahiriza amategeko n’amabwiriza ayagenga, arimo Itegeko Nº 50/2007 rigena imikorere y’amakoperative n’amavugururwa yakurikiyeho yibanda ku miyoborere, imicungire y’umutungo n’igenzura.

Mu buhamya bwatanzwe n’abanyamuryango, Kantarama Peace wo muri koperative Berwa Rwanda Matimba ikora ibikomoka ku mpu, yavuze ko gukorera hamwe byatumye ibiciro by’ibikoresho bigabanyuka ndetse umusaruro ukazamuka. Yagize ati“Iyo uri wenyine urahendwa, ariko koperative yaduhaye imbaraga n’inyungu.”

Ibirori byaranzwe no gushimira amakoperative agaragaza imikorere myiza no gutanga seritifika y’ishimwe kuri buri munyamuryango witabiriye. Ubuyobozi bw’akarere bwasezeranyije gukomeza guhugura no gutera inkunga amakoperative kugira ngo akomeze kuba “inkingi ya mwamba y’iterambere ry’abaturage n’akarere ka Nyagatare.”

Umunsi mpuzamahanga w’amakoperative wizihizwa  buri mwaka ku wa gatandatu wa mbere w’ukwezi kwa nyakanga. Uyu mwuka wizihijwe ku itariki ya 5 nyakanga. Mu Rwanda, ibirori byo kuwizihiza ku rwego rw’igihugu byabereye mu karere ka Rusizi ku itariki ya 31 ukwakira 2025.

UWAMALIYA Mariette